Кызмале...

Ник кайныйсың болай көне-төне,

Үзең дә бит син яклаусыз.

Зәңгәр экраннарда «кесәл»ләре кайный,

 «сандугач»ы сайрый туктаусыз…

Телләрне, ди, кысалар, ди, анда –

Молованны, румын, полякны!

Хохол теле бердәнбер, ди, икән,

Башкалары чүпкә яраклы.

Мин татар да ярсый-ярсый кайныйм,

Кайный-кайный ярсыйм бу хәлгә!

Урысчалап хәтта сүгенәмен,

Кагылмале димен син телгә!

Бер чак суынгачтын туктап торам.

Бик кызмале димен син алай!

Үз телеңне кискән чакларында

Кайда булдың, и татар малай?!