Төрки кавем

Галиҗәнәп вакыт мәрҗән кебек

Дисбе җепләренә тезелгән.

Бабаң кабрен балаң беләме соң?

Камыт бавың, күрче, чишелгән...

Белмәс тә шул, чиркәү уты  шаһит:

Боза-сыза тарих яздылар.

Юкка!

Төрки кавем каршысында

Гасырлар да чүгеп калдылар!

Калыккан ул Кытай диварыдай

Татар бугазына барганда.

Скиф бабамнарның камчы тавышы –

Яшен яшьнәгәндә...Болгарда!..

...яшен уйнаганда...Истанбулда,

Астанада, Бәшкәк, Алтайда!

Ашхабад һәм Ташкент каласында

Вә шулай ук төньяк Кытайда!

Яшен атылганда... Анкарада,

Диңгез буйларында – Кырымда.

Төрки кавем хәтре тутыкмыйча

Сакланадыр тарих кынында.

Сакланадыр Тәңре куйнында һәм

Һәр әйтелгән изге азанда!..