Дөбьяз җыры

Зиннур Хөснияр шигыре

Илфат Дәүләтша көе

Йолдыз кунган тау башы

Казаннан дәшеп тора.

Дөбьязың – яшьлек языңны,

Сагынмый яшәп кара...

Хәтерендә саклый Дөбьяз

Үзенең һәр йолдызын.

Сандугачлар отып калган

Сәйдәшенең моң-җырын.

Елатырлык итеп уйный

Габәши моңлы сазын.

Сагышланмый түзеп булмый

Дөбьязым – яшьлек язым.

Кушымта.

Тургайлы тугайлары шул,

Һаман да яшел әле.

Дөбьяз кызы, күз тимәсен,

Йөзеңне яшер әле.